Santimamiko geltokia

Santimamiko aldageltokia izan zen hainbat garraio publikoren arteko konexio-puntua izateko diseinatutako Bilboko lehen azpiegitura. Atari nagusi handi batetik metrora, Renfe Aldirietako trenbidera eta Bilbao Intermodal autobus-geltokira sartzen da. Tranbiaren geralekua ere atari nagusiaren ondoan dago.

Renfe Aldirietako geltokia bera erabat berritu zen, eta sarbide berria zabaldu zen Torres Quevedo biribilgunetik. Horrez gain, bertan ezarritako elementu arkitektoniko eta artistiko zainduei esker, Aldirietako trenbideko azpiegiturarik ikusgarrienetako bat bihurtu zen.

Geltokia lurperatzeko lanek amaiera eman zioten hegoaldeko trenbide-saihesbidearen operazioari. Haren bidez, J.A. Zunzunegui kalea urbanizatu zen, lehengo aire zabaleko trenbide-lubaki zaharra ordezteko. Gurtubay kalea eta Torres Quevedo plaza ere berrurbanizatu ziren. Azken horren azpian lurpeko aparkalekua eraiki zen.